काठमाडौँ। विश्वभर हामीले अनेकौँ आकार र रुपका भवनहरू देखेका छौँ । फिलिपिन्सको नेग्रोस अक्सिडेन्टल प्रान्तमा एउटा रिजोर्टको भवनले भाले कुखुराको आकारको विश्वको सबैभन्दा अग्लो भवनको मान्यता पाएको छ ।
११४ फिट ७ इन्च अग्लो रुष्टर होटलको नाम गिनिज बुकमा पनि लेखिएको छ । यो भवनमा एसीयुक्त १५ वटा कोठा छन् । झट्ट हेर्दा यो भवन वास्तविक विशाल भाले कुखुरा जस्तै देखिन्छ ।
आफूले अरूको ध्यान खिच्ने खालको केही बनाउन चाहेर यो भवन बनाएको पत्रकारहरूलाई रेजोर्टका निर्देशक रिकार्डो कालो ग्वापो टानले भनेका थिए ।
स्थानीय संस्कृतिलाई इज्जत दिन आफूले कुखुरालाई नै छानेको पनि उनले बताए । नेग्रोस अक्सिडेन्टल प्रान्त कुखुरा उद्योगको लागि परिचित छ ।
यो होटल बनाउने काम सन् २०२३ को जुन १० मा सुरु भएको थियो । यो वर्षको सेप्टेम्बरमा मात्रै भवनको निर्माण कार्य पूरा भएको छ ।
