महेन्द्रनगर । उर्लिएको महाकाली नदीमा दाउरा तान्ने क्रममा कञ्चनपुरका दुई जना किशोर बेपत्ता भएका छन् । भीमदत्त नगरपालिका–१२ ऐरी घाट नजिक उर्लिएको महाकाली नदीबाट दाउरा तान्ने क्रममा सोहि ठाउँका दुई जना किशोर बेपत्ता भएका हुन् ।
भीमदत्त–१२ एरी चौराहका १८ वर्षिय सौरभ नेपाली र सोहि वडाको ओदाली बस्ने १६ वर्षिय अभि नेपाली शनिवार १० बजेतिर नदीबाट दाउरा निकाल्नेक्रमा बेपत्ता भएका हुन् ।
उनिहरुको खोजीमा रहेको सशस्त्र प्रहरी र नेपाल प्रहरीले सौरभ नेपालीको शव फेला पारेको छ भने अभि नेपाली अझै बेपत्ता रहेको जिल्ला प्रहरी कार्यालय कञ्चनपुरले जनाएको छ । दोधारा चाँदनी झोलुङ्गे पुल नजिक सौरभको शव फेला परेको प्रहरीले जनाएको छ ।
अहिले पनि बेपत्ता अभिलाई खोज्न सशस्त्र र नेपाल प्रहरी घटनास्थलमा खटिरहेको छ ।
