महेन्द्रनगर । कञ्चनपुर जिल्लाको भिमदत्त नगरपालिका वडा नं ११ र १२ को क्षेत्रमा चितुवा देखिन थालेपछि स्थानीयहरूमा डर र त्रास फैलिएको छ। केही दिन अघि मात्र बाघको आक्रमणले एक महिलाको ज्यान गएको घटना ताजै भएको अवस्थामा फेरि चितुवा देखिन थालेपछि स्थानीयहरू झनै त्रसित भएका छन्।
चितुवा देखापरेपछि स्थानीयहरूलाई उच्च सतर्कता अपनाउन आग्रह गरिएको छ। चितुवाको खोजी गर्न जिल्ला प्रहरी टोली, शसस्त्र प्रहरी, र वन विभागको टोली संयुक्त रूपमा परिचालन गरिएको छ। प्रहरी नायव उपरीक्षक उमेश जोशीका अनुसार चितुवाको खोजी कार्य तीव्र रूपमा भइरहेको छ र स्थानीयलाई सुरक्षित रहन सुझाव दिइएको छ।
