दार्चुला । अपिहिमाल गाउँपालिका–५ मकरीगाडमा बगेर एक जना बेपत्ता भएका छन् । आइतबार बिहान मकरिगाड खोलामा बगेर अपिहिमाल–३ का मोहनसिंह धामी बगेर बेपत्ता भएका हुन् ।
मकरिगाडका स्थानीय बहादुरसिंह धामीका अनुसार उनीसँगै नदीमा बगेका प्रेमसिंह धामीलाई भने स्थानीयले उद्धार गरेका थिए । खण्डेश्वरी बजारमा शनिबार राति अपरिचित दुई जनाले दुईवटा पसलमा चोरी गरी भागेका थिए । चोरी गर्नेहरूलाई समात्न जाँदा मकरिगाड खोलामा मोहन र प्रेम बगेका थिए ।
प्रेम बगेको ठाउँदेखि अलिकति तल ढुगांमा अड्किएर बसेको अवस्थामा स्थानीयले उद्धार गरेका थिए । मोहन भने बेपत्ता अवस्थामा रहेको बहादुरले बताए । अहिले स्थानीय र प्रहरीहरुले बेपत्ता मोहनको खोजबिन गरिरहेको उनको भनाइ छ । चोरी गर्नेहरू अहिले भागेर खण्डेश्वरी गाउँतिर लागेको बहादुरले जनाए ।
