महेन्द्रनगर । महाकाली लगायत कञ्चनपुरका अन्य विभिन्न नदीनालामा आएको बाढीका कारण करिब ९ सय परिवार विस्थापित भएका छन् । अविरल वर्षासँगै आएको बाढीले डुबान भएपछि विस्थापित हुनेको संख्या अझै बढ्न सक्ने देखिन्छ ।
जिल्ला प्रहरी कार्यालयका अनुसार सोमबार बिहानसम्म ८ सय ९१ परिवारका ३ हजार २९३ जनालाई सुरक्षित स्थानमा सारिएको छ ।
दोधारा चाँदनी, भीमदत्त नगरपालिका, बेदकोट, बेलडाडी, बेलौरी र पुनर्वासमा बाढीका कारण बढी डुबान भएको छ । डुबानमा फसेका २९ जनाको सकुशल उद्धार गरिएको प्रहरीले जनाएको छ ।
दोधारा चाँदनी नगरपालिकामा महाकाली नदीको बाढीले जोगबुडाको बाढी थुनिँदा केही बस्ती डुबानमा परेका छन् ।
कुतियाकभर, शान्तिटोल, निशानी टोल, बैदीफाँटा, सुन्दरनगर र कञ्जभोजलगायतका बस्ती डुबानमा परेको दोधारा चाँदनी नगरपालिकाका नगर प्रमुख किशोर लिम्बूले बताए ।
‘जोगबुडाको बाढी बस्तीमा पस्ता तीन सय बढी परिवार विस्थापित भएका छन्,’ नगर प्रमुख लिम्बूले भने, ‘बाढी झन् बढिरहेको छ, बस्ती पूरै जलमग्न भएको छ ।’ उनका अनुसार विस्थापित भएकाहरू नजिकैको विद्यालय र आफन्तको घरमा आश्रय लिई बसेका छन् ।
भुजेला खोलाको बाढी बस्तीमा पस्दा भीमदत्त नगरपालिका ११, १२ र १३ का १ सयभन्दा बढी परिवार विस्थापित भएका छन् । महाकाली नदीले खोलाको बहाव रोक्दा बाढी बस्तीमा पसेको हो । विस्थापित परिवार वडा कार्यालय र विद्यालयमा बसेका छन् ।
जिल्ला सदरमुकाम महेन्द्रनगर बजारसमेत डुबानमा परेको छ । यहाँ पनि सयौं परिवार विस्थापित भएको प्रहरीले जनाएको छ ।
बजार क्षेत्रमा पानीको निकास नहुने र नदी नालाको पानीसमेत बजारमै पसेका कारण डुबान भएको हो । अझै पनि वर्षा नरोकिएका कारण डुबान कम हुन सकेको छैन । बजार क्षेत्रमा खोलानाला मिचेर घर निर्माण गरेका कारण डुबान भएको स्थानीय बताउँछन् ।
यसैगरी चौधर नदी बस्तीमा पस्दा बेलडाडी क्षेत्रका पनि विभिन्न क्षेत्रमा डुबान भएको छ । दोदा र मछेली नदीमा आएको बाढीले पनि नदी किनारका बस्ती डुबानमा परेका छन् ।
महाकाली नदीमा पानीको बहाव सोमबार पनि उच्च रहेको छ । प्रहरीका अनुसार सोमबार बिहानको मापनअनुसार महाकालीमा पानीको बहाव २ लाख ५५ हजार क्युसेक पुगेको छ ।
शारदा ब्यारेजको बनवासा पुलमा शनिबारदेखि बन्द गरिएको ठूला (चारपांग्रे) सवारी साधनको आवागमन तेस्रो दिन पनि बन्द रहेका छन् ।
महाकालीमा पानीको बहाव एक लाख क्युसेक नाघ्नेबितिक्कै जोखिम हुने भन्दै ठूला सवारी साधनको अवागमनमा रोक लगाइने गरेको छ ।
