महेन्द्रनगर । कञ्चनपुरको शुक्लाफाँटा–८ अनौखी खोलाबाट दुई ट्याक्टरलाई प्रहरीले नियन्त्रणमा लिएको छ । शुक्रवार साँझ अनौखी खोलाबाट ग्रावेल सहितका दुई ट्याक्टर स्थानीयले नियन्त्रणमा लिई प्रहरीलाई बुझाएका हुन् ।
खोलाबाट अबैध रुपमा नदीजन्य पदार्थ उत्खनन् गर्दै आएको अवस्थामा भेट्टिएपछि से १ त ६५५८ र सुपप्र ०२–००१ त १२६५ नम्बरका ट्याक्टर स्थानीयले नियन्त्रणमा लिई ईलाका प्रहरी कार्यालय झलारीको जिम्मा लगाएका हुन् ।
अबैध रुपमा नदीजन्य पदार्थ उत्खनन् गर्दै आएका उक्त दुवै ट्याक्टर शुक्लाफाँटा नगरपालिकाका नगर प्रमुख रणबहादुर महराका सहोदर भाई लोकेन्द्र बहादुर महराका हुन् । यद्यपी नगर प्रमुख महराका भाईको फर्म आरपी हार्डवेयर एण्ड सप्लायर्सले महाकाली सिँचाई योजना निर्माण कम्पनी वराहा डेभ्लपर्स प्रा.ली. संग भाडामा लगाएको दाबी गरेको छ ।
आरपी हार्डवेयर एण्ड सप्लायर्स र वराहा डेभ्लपर्स प्रालीले मंगलबार भाडा सम्झौता गरेको छ भने शुक्रबार साँझ उक्त दुवै ट्याक्टर शुक्लाफाँटा–८ अनौखी खोलाबाट अबैध रुपमा नदीजन्य पदार्थ उत्खनन् गरि ग्राभेल सहित झलारी तर्फ आईरहेका बेला बेलडाँडी गाउँ बाट नियन्त्रणमा लिई प्रहरीको जिम्मा लगाइएको हो ।
कञ्चनपुरको शुक्लफाँटा र कृष्णपुर नगरपालिकामा नदीजन्य पदार्थ उत्खननमा नगर कार्यपालिकाले नै रोक लगाएको हो । दुवै पालिकामा नदीजन्य पदार्थको ठेक्का नलाग्दा सम्मका लागि उत्खननमा रोक लगाइएको हो ।
कृष्णपुर र शुक्लाफाँटा नगरपालिकामा अवैध रुपमा नदीजन्य पदार्थ उत्खनन्मा दर्जनौं ट्याक्टर प्रहरीको नियन्त्रणमा पर्ने गरेका छन् । एक महिना अघिमात्रै कृष्णपुरबाट एक एमाले नेताको ट्याक्टर समेत प्रहरीले नियन्त्रणमा लिएको थियो ।
