काठमाडौं । अछाममा गोठालो गएका दुई जना किशोरी मृत अवस्थामा भेटिएको घटनाको अनुसन्धानका नेपाल प्रहरीको केन्द्रीय अनुसन्धान ब्यूरो (सीआईबी)को टोली पनि खटिएको छ ।
प्रहरी निरीक्षक इन्सपेक्टर सूर्यबहादुर शाही र वरिष्ठ असई श्रीभक्त श्रेष्ठसहितको टोली अनुसन्धानमा खटिएको सीआईबी प्रवक्ता एवं एसएसपी होविन्द्र बोगटीले जानकारी दिए ।
सो घटनाका लागि प्रदेश प्रहरी कार्यालयको टोली पनि मंगलबारबाट खटिएको छ ।
ढकारी गाउँपालिका–१ को छिन्ने जंगलमा ढकारी–८ पल्साताकी १५ वर्षीय सरस्वती खड्का र १४ वर्षीय इशरा खड्का बाख्रा चराउन गएको अवस्थामा मृत भेटिएका थिए ।
जिल्ला प्रहरी कार्यालय अछामका प्रमुख, डीएसपी ईश्वरी भण्डारीका अनुसार घटनाको अनुसन्धानका लागि दुई जनालाई पक्राउ गरिएको छ ।
उनीहरूमाथि अनुसन्धान जारी छ । सोधपुछका लागि समेत प्रहरीले केहीलाई नियन्त्रणमा लिएको थियो । उनीहरूलाई सोधपुछपछि छाडिएको प्रहरीले जनाएको छ ।
डीएसपी भण्डारीले घटना हत्या वा भवितव्य के हो ? अहिले नै भन्न सकिने अवस्था नरहेको बताए ।
भेरी प्रादेशिक अस्पतालमा मृतक किशोरीहरूको शव परीक्षण गरिएको छ तर रिपोर्ट आउन बाँकी छ । उनीहरू शव मंगलबार अछाम ल्याइने प्रहरीले जनाएको छ ।
प्रहरीले तालिम प्राप्त कुकुरको सहयोगमा अनुसन्धान गरिरहेको छ । मृतकका आफन्तले घटना शंकास्पद रहेकाले गहिरो अनुसन्धान हुनुपर्ने माग गरेका छन् ।
