धनगढी। सुदूरपश्चिम प्रदेशमा सवारी चालक अनुमति पत्र (लाइसेन्स)का लागि परीक्षा दिएका हजारौं चालकहरूले २ वर्षसम्म पनि लाइसेन्स पाउन सकेका छैनन्। यातायात व्यवस्था विभागको प्रिन्टिङ प्रक्रियामा देखिएको अवरोधका कारण यस्तो समस्या उत्पन्न भएको हो।
यातायात व्यवस्था कार्यालय, धनगढीका प्रमुख नरेन्द्र शाहका अनुसार विभागमा केवल एक प्रिन्टरबाट वार्षिक करिब १० लाख सवारी चालक अनुमति पत्र छपान गर्नुपर्ने हुन्छ, जसले गर्दा अत्यधिक विलम्ब भएको हो। शाहले भने, “हामीसँग एक मात्र प्रिन्टर छ। वार्षिक १० लाख लाइसेन्स छपान गर्नुपर्ने बाध्यता छ, जसले गर्दा काममा ढिलाइ भएको छ।”
धनगढीमा मात्र करिब ३० हजार सवारी चालकले अझै पनि आफ्नो लाइसेन्स पाएका छैनन्। शाहका अनुसार सन् २०२३ को डिसेम्बरसम्म ३२ हजार लाइसेन्स छपाइ गरेर पठाइएको भए पनि सन् २०२२ को अगस्टदेखि डिसेम्बरसम्मका लाइसेन्सहरू अझै आइपुगेका छैनन्। उनले थपे, “लाइसेन्सको छपाइ र वितरण प्रक्रियामा थुप्रै चुनौतीहरू छन्, र कति छपाइ भइसकेका छन् भन्ने ठ्याक्कै जानकारी हामीसँग छैन।”
समस्या समाधानका लागि स्थानीय स्तरमै छपाइको व्यवस्था गर्ने बारेमा छलफल थालिएको भए पनि त्यसका लागि ठोस कार्यक्रम तय भइनसकेको जानकारी शाहले दिए।
