Tuesday, July 23, 2024

लालझाँडीको आगामी आर्थिक वर्षको बजेट ५१ करोड ८३ लाख ७ हजार

प्रकाशित:

महेन्द्रनगर । कञ्चनपुरको लालझाडी गाउँपालिकाले आगामी आर्थिक वर्ष २०८१।०८२ का लागि ५१ करोड ८३ लाख ७ हजार बराबरको बजेट सार्वजनिक गरेको छ । लालझाडी गाउँपालिकाका अध्यक्ष निर्मल रानाको सभाध्यक्षतामा आइतबार आयोजित गाउँ सभा अधिवेशनमा अध्यक्ष रानाले नीति तथा कार्यक्रम र उपाध्यक्ष सपना चौधरी रानाले बजेट प्रस्तुत गरेका हुन ।

गाउँ सभा अधिवेशनलाई विशेष सम्बोधन गर्दै कार्यक्रमका प्रमुख अतिथि सुदूरपश्चिम प्रदेश सरकारका मन्त्री वीर बहादुर थापाले प्रदेश सरकारबाट लालझाडी गाउँपालिकाका लागि विनियोजित बजेट पर्याप्त नभए पनि आगामी दिनमा बजेटका लागि पहल गर्ने बताउँदै बजेट आउनु भन्दा केही दिन अगाडि मात्रै मन्त्री नियुक्त भएकोले अहिलेको बजेटमा धेरै योजनाहरू समावेश गर्न नसकिएको बताए ।

“सन्तुलित विकास एवम् दिगो पूर्वाधारस समृद्ध लालझाडीको आधार” भन्ने मूल अभिप्रायका साथ लालझाडी गाउँपालिकाले कृषि, शिक्षा, स्वास्थ्य, भौतिक पूर्वाधार, खानेपानी, सरसफाइ, स्वरोजगारमूलक उद्यमशीलता लगायतका योजनालाई प्राथमिकतामा राखेर बजेट विनियोजन गरेको गाउँपालिकाका प्रवक्ता आशाराम रानाले बताएका छन । त्यस्तै गाउँपालिकाले वडा नम्बर १ लाई ४५ लाख, वडा नम्बर २ लाई ४० लाख, वडा नम्बर ३ लाई ४१ लाख, वडा नम्बर ४ लाई ५० लाख, वडा नम्बर ५ लाई ३६ लाख र वडा नम्बर ६ लाई ३६ लाखसम्मको रकम विनियोजन गरिएको उहाँले जानकारी दिनुभयो ।

नगर सभाले आइतबार नै उक्त नीति तथा कार्यक्रम र बजेट पारित गरेको लालझाडी गाउँपालिकाका अध्यक्ष निर्मल रानाले जानकारी दिए । प्रमुख अतिथि सुदूरपश्चिम प्रदेश सरकारका मन्त्री वीर बहादुर थापा र गाउँपालिकाका अध्यक्ष निर्मल रानाले संयुक्त रूपमा १६ औँ गाउँ सभाबाट पालिकाको लोगो सार्वजनिक गर्नु भएको छ । सेवा निवृत्त २ जनालाई महिला स्वयंसेविकाहरूलाई नगद रु ५१ हजार सहित बिदाइ र स्वैच्छिक अवकाश लिनुभएका २ जना महिला स्वयंसेविकाहरूलाई कदर पत्र प्रदान गरिएको छ ।

पालिकाका भित्र रहेका ३ वटा स्वास्थ्य चौकीका प्रमुख र ३ वटा आधारभूत स्वास्थ्य सेवा केन्द्रमा कार्यरत प्रमुखलाई समेत सम्मान गरिएको लालझाडी गाउँपालिकाका प्रमुख प्रशासकीय अधिकृत राज बहादुर सार्कीले जानकारी दिए। अधिवेशनमा केही स्थानीय ऐन संशोधन विधेयक र शिक्षा, जलश्रोत, पशुपक्षी सम्बन्धी लगायतका विधेयकहरू प्रस्तुत गरिएको उनले जानकारी दिए ।

ताजा समाचार

सम्बन्धित समाचार