महेन्द्रनगर । कञ्चनपुरमा रहेको वातावरण संरक्षण तथा समाज कल्याण संघ नेपाल पेसवानले ८ सय ७४ जना बिद्यार्थीहरुलाई झोला वितरण गरेको छ ।
कञ्चनपुरको शान्ती निकेतन मावी, जेसिज मावी, र लक्ष्मी मावीका बिद्यार्थीहरुलाई निःशुल्क स्कुल झोला वितरण गरेको हो ।
एक कार्यक्रमको आयोजना गर्दै पेसवान नेपालले शान्ती निकेतन मावीमा २ सय ५२ जना, जेसिज मावीमा २ सय ७१ जना, लक्ष्मी मावीमा ३ सय ५१ जना बिद्यार्थीहरुलाई झोला वितरण गरेको संस्थाका सदस्य दमन चन्दले जानकारी दिएका छन् ।
उक्त संस्थाले कञ्चनपुरमा ३८ वटा र कैलालीमा २ वटा गरी ४० वटा बिद्यालयका विद्यार्थीहरुलाई बिभिन्न शैक्षिक सामग्री सहितको झोला वितरण गर्ने कार्यक्रम रहेको छ ।
विद्यार्थीहरुका लागि आवश्यक पर्ने, कापी, कलम, कलर बक्स, टिफिन, स्वास्थ्य सामग्री लगायतका सामग्रीहरु उक्त झोलामा राखिएको छ । उक्त शैक्षिक सामग्री सहितको एक स्कुल झोला बजार मुल्य दुई हजार भन्दा बढी रहेको पेसवान नेपालका उपाध्यक्ष पशुपति थापा मगरले बताइन् ।
चाइना फाउण्डेसन नेपालको सहयोगमा पेसवान नेपाललले गत वर्ष भीमदत्त २८ विद्यालयका चार हजार ३ सय ४० जना विद्यार्थीहरुलाई झोला वितरण गरेको संस्थाका सदस्य चन्दले बताए ।
चालु आर्थिक वर्षमा कञ्चनपुरमा भीमदत्त नगरपालिकामा २४ वटा, दोधारा चादनी नगरपालिकामा ११ वटा र कैलालीको जानकी गाँउपालिकामा २ वटा विद्यालयका ६ हजार ७ सय बिद्यार्थीहरुलाई बिभिन्न शैक्षिक सामग्री सहितको झोला वितरणको कार्यक्रम गरिने उनले बताए ।
भाद्र महिनाको दोस्रो सातादेखी सबै बिद्यालयमा रातो झोला छात्राहरुलाई र निलो झोला छात्रहरुलाई १९ वटा शैक्षिक सामग्री राखेर वितरण थालिसकेको पेसवान नेपालकी उपाध्यक्ष थापा मगरले बताईन् ।
आफुहरुले बिद्यालय छनौट गर्दा सबै भन्दा बढी दलित, पिछडिएको वर्ग, विपन्न बालबालिका रहेको शैक्षिक संस्था सामुदायिक बिद्यालयलाई छानेर बाल कक्षा देखी कक्षा ८ सम्मका सबै बिद्यार्थी भाईबहिनीहरुलाई उक्त अति उपयोगी झोला वितरण गर्ने उनले बताइन् ।
