महेन्द्रनगर । नेपाली कांग्रेसका नेता तथा भीमदत्त नगरपालिका वडा नं. ५ का वडाध्यक्ष पदमराज अवस्थी आफ्नो तलब भत्ता वडाको एक विद्यालयलाई प्रदान गरेका छन् ।
विद्यार्थीहरुलाई पोसाक तथा टाई बेल्टको अभाव टार्न सहयोग पुगोस भन्ने ध्येयले वडाध्यक्ष अवस्थीले आफ्नो तलब भत्ता बाफतको रकम एक विद्यालयलाई हस्तान्तरण गरेका हुन् ।
सोमबार भीनपा–५ मा रहेको सत्यवादी माद्यमिक विद्यालयलाई उनले आफ्नो तलब भत्ता बाफतको रकम हस्तान्तरण गरेका हुन् । चाइना फाउण्डेसनको सहयोग तथा पेसवान नेपालको आयोजनामा उक्त विद्यालयका विद्यार्थीहरुलाई स्कुल झोला वितरणको अवसरमा वडाध्यक्ष अवस्थीले पनि आफ्नो तलब भत्ता विद्यालयलाई हस्तान्तरण गरेका हुन् ।
आर्थिक रुपले पारिवारिक अवस्था कमजोर भएका विद्यार्थीहरुका लागि पोसाक तथा टाई बेल्ट खरिद गर्दा केही राहत पुगोस्, भन्ने मनसायले आफ्नो तलब भत्ता वितरण गरेको वडाध्यक्ष अवस्थीले बताए ।
असहाय, विपन्न तथा कमजोर आर्थिक अवस्थाका विद्यार्थीहरुलाई स्टेशनरी तथा स्कुल पोसाकको अभावकै कारण विद्यालयको शिक्षाबाट बञ्चित हुन नपरोस भन्ने धारणका साथ आफु उनीहरुको अभिवावकीय भूमिका निर्वाह गर्ने समेत वडाअध्यक्ष अवस्थी बताउछन् ।
वडाध्यक्ष अवस्थीले सत्यवादी माविलाई आफ्नो तलब भत्ता बाफतको १५ हजार रुपैया हस्तान्तरण गरेका हुन् ।
