२०७९ माघ २२, आईतवार |
Sunday, February 5, 2023

बेलौरी खजुरीया भारतीय सीमा नाकाबाट दुई जना युवतीहरूको उद्धार

प्रकाशित:

महेन्द्रनगर । कञ्चनपुरकै बेदकोट नगरपालिका वडा नम्बर ५ धरमपुर घर भएका १७ वर्षीया किशोरी र २० वर्षीया युवतीलाई शनिबार दिउँसो बेलौरी खजुरीया सीमा नाका भएर भारत जान लागेको अवस्थामा उद्धार गरिएको शान्ति पुनर्स्थापना गृह सम्पर्क कार्यालय बेलौरीका परामर्शदाता नितु बिष्टले जानकारी दिए ।

भारत जान लागेका एकैघरका दिदीबहिनीहरूलाई शङ्का लागी सोधपुछ गर्दा लेखपढ गर्न नजान्ने, घरपरिवार कसैको पनि सम्पर्क टेलिफोन नम्बर थाहा नभएको, कहाँ जान लागेको भन्ने पनि जानकारी नभएको र अपरिचित व्यक्तिले भारतमा रोजगारीका लागि प्रेरित गरेकोले आफूहरू बेलौरी नाकाबाट भारत जान लागेको खुल्न आएपछि बेचबिखनको जोखिममा पर्न सक्ने भन्दै उहाँहरूको उद्धार गरिएको बताए ।

उद्धार कार्यमा शान्ति पुनर्स्थापना गृहसँगै सशस्त्र प्रहरी बल नेपाल, नेपाल प्रहरी, भारतीय सीमा सुरक्षा बल र स्थानीय जनप्रतिनिधिको महत्त्वपूर्ण भूमिका रहेको छ ।

उद्धारपछि दुवै जनालाई शनिबार बेलौरी स्थित अल्पकालीन सुरक्षित आवास गृहमा राखिएको र आइतबार बिहान उहाँहरूका बुवालाई बोलाई जिम्मा लगाइएको शान्ति पुनर्स्थापना गृह सम्पर्क कार्यालय बेलौरीले जनाए ।

भारतसँग सीमा जोडिएका कञ्चनपुरका विभिन्न क्षेत्रमा शान्ति पुनर्स्थापना गृहले सम्पर्क कार्यालय स्थापना गरी मानव बेचबिखन रोकथाम र जनचेतना प्रवाहलाई प्राथमिकता दिएको शान्ति पुनर्स्थापना गृह कञ्चनपुरका संयोजक सञ्जीत सिंहले बताए ।

ताजा समाचार

सम्बन्धित समाचार