पुनर्वास। “लागूऔषधविरुद्ध हाम्रो लडाइँ, लागूऔषध छोडौँ” भन्ने मूल नारासहित कञ्चनपुरको पुनर्वासमा युवालाई खेलकुदसँग जोड्दै लागूऔषधविरुद्ध सचेतना फैलाउने उद्देश्यले एकदिवसीय मैत्रीपूर्ण फुटबल प्रतियोगिता सम्पन्न भएको छ।
अरनिको खेलकुद विकास समिति र अरनिको युवा क्लबको आयोजनामा भएको प्रतियोगितामा हिमाल फ्रेन्ड्स पुनर्वास–११ र अरनिको युवा क्लब पुनर्वास–२ बीच रोमाञ्चक तथा प्रतिस्पर्धात्मक खेल भएको थियो। निर्धारित समयसम्म दुवै टोलीले उत्कृष्ट खेल प्रदर्शन गर्दै समान ४–४ गोल गरेपछि खेल बराबरीमा टुंगिएको हो।
खेल अवधिभर दुवै टोलीले आक्रामक र आकर्षक फुटबल प्रस्तुत गरेका थिए। मैदानमा खेलाडीहरूको उत्कृष्ट प्रदर्शनसँगै दर्शकहरूले पनि रोमाञ्चक खेलको भरपूर आनन्द लिएका थिए। प्रतियोगिताले खेलकुदको विकाससँगै युवाबीच आपसी मित्रता, सहकार्य, अनुशासन र सकारात्मक सोचको वातावरण निर्माण गर्ने सन्देश दिएको आयोजकले जनाएको छ।
कार्यक्रममा प्रमुख अतिथिका रूपमा समाजसेवी तथा युवा नेता माइकल तामाङ, विशिष्ट अतिथिका रूपमा खेलप्रेमी तथा समाजसेवी निशान तामाङ तथा नेपाल पत्रकार महासंघ कञ्चनपुर शाखाका कार्यसमिति सहसचिव एवं ग्लोबल एचडी टेलिभिजनका पत्रकार किशोर तामाङ उपस्थित थिए। यस्तै, अरनिको युवा क्लबका टिम व्यवस्थापक गोपाल तामाङ तथा हिमाल फ्रेन्ड्सका टिम व्यवस्थापक सुदीप घर्तीको समेत उपस्थिति थियो।
कार्यक्रमलाई सम्बोधन गर्दै प्रमुख अतिथि माइकल तामाङले युवालाई सकारात्मक तथा सिर्जनात्मक गतिविधिमा जोड्न र लागूऔषधको दुर्व्यसनबाट जोगाउन खेलकुद तथा सामाजिक कार्यक्रमलाई निरन्तरता दिनुपर्नेमा जोड दिए।
उनले भने, “कुलतले जीवन खोस्छ, खेलकुदले भविष्य बनाउँछ। लागूऔषध त्यागौँ, खेलकुद रोजौँ र स्वस्थ समाज निर्माणमा हातेमालो गरौँ।”
युवालाई लागूऔषधबाट टाढा राख्नु परिवार, समाज र राज्य सबैको साझा जिम्मेवारी भएको उल्लेख गर्दै उनले लागूऔषधविरुद्धको अभियानलाई घरपरिवारदेखि समुदाय र राज्यस्तरसम्म प्रभावकारी रूपमा अघि बढाउनुपर्ने बताए।
कार्यक्रमले “युवाको हातमा खेलकुदको बल होस्, लागूऔषधको होइन” भन्ने सकारात्मक सन्देश प्रवाह गरेको आयोजकको भनाइ छ। खेलकुदका माध्यमबाट कुलतमा फसेका तथा कुलततर्फ आकर्षित भइरहेका युवालाई सकारात्मक बाटो रोज्न प्रेरित गर्न सकिने विश्वास आयोजकले व्यक्त गरेको छ।
अरनिको युवा क्लबका सचिव जीवन तामाङले खेलकुदले युवामा सकारात्मक सोच, अनुशासन, आत्मविश्वास र नेतृत्व क्षमताको विकास गर्न महत्वपूर्ण भूमिका खेल्ने बताए। उनका अनुसार युवालाई सिर्जनात्मक तथा उत्पादनशील गतिविधिमा सक्रिय बनाउन यस्ता कार्यक्रम प्रभावकारी माध्यम बन्न सक्छन्।
सहभागीहरूले खेलकुद मनोरञ्जनको माध्यम मात्र नभई अनुशासन, आत्मविश्वास, नेतृत्व क्षमता र सामाजिक एकताको आधारसमेत भएको बताएका छन्। युवालाई नियमित रूपमा खेलमैदानसँग जोड्न सके लागूऔषधलगायतका सामाजिक विकृतिबाट टाढा राख्न महत्वपूर्ण योगदान पुग्ने उनीहरूको भनाइ छ।
अरनिको युवा क्लबका अध्यक्ष सूर्य तामाङले आगामी दिनमा पनि युवाको प्रतिभा पहिचान, खेलकुदको विकास तथा लागूऔषधविरुद्ध जनचेतना अभिवृद्धि गर्ने उद्देश्यले विभिन्न कार्यक्रमलाई निरन्तरता दिने प्रतिबद्धता व्यक्त गरे।
पुनर्वासमा सम्पन्न मैत्रीपूर्ण फुटबलले प्रतिस्पर्धासँगै सामाजिक चेतनाको सन्देशसमेत बोकेको छ। मैदानमा खेलाडीको खुट्टाले गोल खोजिरहँदा कार्यक्रमले भने समाजमा एउटा स्पष्ट सन्देश दिएको छ— युवाको ऊर्जा कुलतमा होइन, खेलकुद, सिर्जना र सकारात्मक परिवर्तनमा लगाऔँ। लागूऔषधविरुद्धको अभियानलाई खेलकुदसँग जोडेर अघि बढाइएको यस्तो पहलले स्वस्थ, अनुशासित र सभ्य समाज निर्माणमा महत्वपूर्ण टेवा पुग्ने अपेक्षा गरिएको छ।
