महेन्द्रनगर । सुदूरपश्चिममा ८० पुरुषले दोस्रो श्रीमती भित्र्याएको पाइएको छ । २०८० असार मसान्तसम्म घरमा श्रीमती हुँदाहुँदै दोस्रो विवाह गरेको भन्दै पीडित प्रहरी हुँदै अदालतसम्म पुगेका छन्।
![वातावरण संरक्षण तथा समाज कल्याण संघ नेपाल (पेशवान) द्वारा जारी सूचना ।।](https://nigaranikhabar.com/wp-content/uploads/2024/01/22fd5bae-c175-49e7-8e38-cc351ae8f5e6.jpg)
घरकी श्रीमतीलाई बेवास्ता गर्दै दोस्रो विवाह गर्ने श्रीमान विरुद्ध पीडित महिला न्यायका लागि प्रहरी हुँदै अदालतसम्म पुगेका हुन् । घरमा श्रीमती हुँदाहुँदै अर्कीलाई भित्र्याएको भन्दै पीडित महिलाले कारबाहीको माग गर्दै प्रहरी र अदालतमा उजुरी दिएका छन् । सुदूरपश्चिमका ९ वटै जिल्लामा गरी असार मसान्तसम्म ८० पुरुषले घरमा श्रीमती हुँदाहुँदै अर्को विवाह गरेको पाइएको छ ।
![](https://nigaranikhabar.com/wp-content/uploads/2022/11/harikrishna-traders-suppliers.gif)
बहुविवाहका ८० उजुरी दर्ता भएको पाइएको राष्ट्रिय मानव अधिकार आयोगको पछिल्लो तथ्यांकले देखाएको छ । मुलुकी अपराध संहिता २०७४ को दफा १७५ को उपदफा ९४० मा बहुविवाहसम्बन्धी कसुर गर्ने वा गराउने व्यक्तिलाई एक वर्षदेखि पाँच वर्षसम्म कैद र दस हजार रुपैयाँदेखि पचास हजार रुपैयाँसम्म जरिवानाको व्यवस्था छ।
![](https://nigaranikhabar.com/wp-content/uploads/2024/01/NNSWA.jpg)
उक्त अवधिसम्म एक हजार दुई सय ८ महिला घरेलु हिंसाको सिकार भएको समेत आयोगको प्रतिवेदनमा उल्लेख छ । त्यसैगरी जबरजस्ती करणी एक सय ८९ र जबरजस्ती करणी उद्योगमा ६४ उजुरी दर्ता भएको पाइएको छ ।
उल्लिखित तथ्याङ्कलाई हेर्दा अझै पनि महिला अधिकार पूर्णतः संरक्षण हुन नसकेको देखिएको छ ।
घरेलु हिंसा, जबरजस्ती करणी, बेचबिखन, बहुविवाह, छाउपडीप्रथा अहिले पनि विद्यमान छ । घरेलु हिंसामा व्यापक बढोत्तरी भइरहेको छ । समय र विकासक्रम सँगसँगै महिलामाथि हुने विभेद, हिंसाको प्रकार र रूप पनि फरक हुँदै गइरहेको छ । यौन दुव्र्यवहार, कुटपिटजस्ता घटनाहरूबाट महिलाहरू पीडित बन्न पुगेका छन्।