महेन्द्रनगर । कृष्णपुर नगरपालिकाले निःशुल्क शव वाहन सेवा सञ्चालनमा ल्याएको छ। नगरवासीलाई आर्थिक तथा व्यवस्थापकीय सहजता पुगाउने उद्देश्यले शव वाहन सेवा सञ्चालनमा ल्याएको नगर प्रमुख हेमराज ओझाले बताए।
नगरबासीलाई पहिलो प्राथमिकतामा राखेर सेवा सञ्चालन गरिएको बताउँदै उनले छिमेकी पालिकाका बासिन्दालाई पनि निःशुल्क सेवा उपलव्ध गराउने व्यवस्था मिलाईएको बताए।
‘शव बाहन अभावमा नागरिकले निजी गाडीमा शव लैजानुपर्ने बाध्यता हटाउने उद्देश्यले यो सेवा सुरु गरिएका छौं,’ उनले भने, ‘नगरपालिकाको सामाजिक उत्तरदायित्व अनुसार जनताको दुःखमा साथ दिने हाम्रो प्रयास हो।’निःशुल्क शव वाहन सेवाको सञ्चालनसँगै नागरिकले नगर कार्यालय संगै सम्बन्धित वडाबाट सहज रूपमा सेवा लिन सक्ने व्यवस्था मिलाइएको छ।
चालकसंँग सम्पर्क गरेर पनि सेवा प्राप्त गर्न सक्ने व्यवस्था गरिएको वडा नं. २ का वडा अध्यक्ष अर्जुनबहादुर साउँदले बताए।उनका अनुसार नगरपालिकाले यसअघि एम्बुलेन्स सेवा, स्वास्थ्य शिविर, विपन्न लक्षित कार्यक्रम जस्ता सामाजिक पहलहरू सञ्चालन गर्दै आएको छ।
शववाहन सेवा थपिएसँगै नगरपालिकाले नागरिकमैत्री सेवा विस्तारमा नयाँ उदाहरण प्रस्तुत गरेको उनको भनाइ रहेको छ।स्थानीय समाजसेवी, जनप्रतिनिधि र सर्वसाधारणले नगरपालिकाको यो कदमलाई स्वागत गर्दै दुःखद घडीमा राहतको महसुस हुने प्रतिक्रिया दिएका छन्। शव बाहन नगरपालिकाको आन्तरिक आय २६ लाखमा खरिद गरिएको बताइएको छ।
