काठमाण्डौ। सिक्टा सिँचाइ आयोजनाको भ्रष्टाचार प्रकरणमा पूर्वमन्त्री एवं कालिका कन्स्ट्रक्सननामक निर्माण कम्पनीका सञ्चालक विक्रम पाण्डे सर्वोच्च अदालत पुगेर म्याद बुझेका छन्।
माटोलाई दोष दिएर ठेकेदारलाई उन्मुक्ति दिने गरी विशेष अदालतले गरेको फैसलामा सर्वोच्चले पुनर्विचार गर्ने भएपछि उक्त मुद्दाको सूचना बुझ्न पाण्डे बुधबार आफै सर्वोच्च पुगेका थिए।
सर्वोच्चका न्यायाधीशद्वय तिलप्रसाद श्रेष्ठ र सुनीलकुमार पोखरेलको इजलासले विशेष अदालतले पाण्डेलाई सफाइ दिँदा गरेको प्रमाणको मूल्यांकन विचारणीय भनेको छ। पुस १९ गते सर्वोच्चले उनलाई झिकाउने आदेश गरेको थियो। उक्त आदेशको सूचना पाण्डेले बुझेका हुन्।
आदेशमा विशेषको फैसलाका कमजोरी औँल्याउँदै सर्वोच्चले यस प्रकरणमा भ्रष्टाचार ठहर हुन सक्ने केही बुँदाहरू पनि पहिल्याएको छ।
सम्भाव्यता अध्ययन प्रतिवेदनको आधारमा विस्तृत अध्ययन गरी डिजाइन नगरिएको, उक्त क्षेत्रको माटो कमजोर रहेको कुरा प्रतिवेदनहरूमै स्पष्ट उल्लेख भइरहेको, प्रतिवेदनबाट माटो कमजोर रहेको देखिएकोमा वाटर टाइट गरी पानी चुहावट नहुने गरी निर्माण गरिनुपर्नेमा सोबमोजिम भएको नदेखिएको आदेशमा उल्लेख छ।
यस्तै माटो परीक्षणसम्बन्धी प्रावधानहरू सम्झौतामा नराखी ठेक्का सम्झौता गरिएको, निर्माण हुनासाथ गरिएको अध्ययनबाट नहरको संरचना चर्केको, टर्फिन उप्केको जस्ता त्रुटिपूर्ण निर्माण भएको देखिई नेपाल सरकारलाई हानी नोक्सानी पुऱ्याउने कार्य भएको पनि आदेशमा स्पष्ट लेखिएको छ।
रमेशकुमार पोखरेल र यमुना भट्टराईको इजलासले भ्रष्टाचार मुद्दाका अभियुक्तको पक्षमा फैसला गरेको थियो।
१० वर्षभन्दा धेरै समय र १३ अर्बमाथि रकम खर्चेर निर्माण गरिएको आयोजनामा पानी छाड्नेबित्तिकै भत्किएको थियो।
परीक्षणका लागि पानी छाड्नेबित्तिकै सिक्टाको मूल नहर नै भत्किएपछि अख्तियारले अनुसन्धान अघि बढाएको थियो। अख्तियारले गरेको अनुसन्धानले डिजाइन र निर्माणमा गम्भीर त्रुटि मात्र होइन, सरकारी कर्मचारी र ठेकेदारबीच मिलेमतोमा गुणस्तरहीन काम गरेको निष्कर्षसहित २०७५ मंसिरमा भ्रष्टाचार मुद्दा चलाएको थियो।
