कञ्चनपुर। गृहमन्त्री रमेश लेखकले कञ्चनपुरको भीमदत्त नगरपालिका–६ को वडाध्यक्षमा नेपाली कांग्रेसका उम्मेदवार प्रकाश चन्दलाई विजयी गराउन आग्रह गरेका छन्।
नेपाली कांग्रेस कञ्चनपुरले आयोजना गरेको कार्यकर्ता भेटघाट कार्यक्रममा बोल्दै गृहमन्त्री लेखकले कांग्रेस उम्मेदवारलाई जिताउन लाग्नु पर्ने बताए।
नेपाली कांग्रेसका केन्द्रीय सदस्य समेत रहेका लेखकले कार्यकर्ता भेटघाट कार्यक्रममा कांग्रेस उम्मेदवार चन्दको प्रशंसा गरे।
‘प्रकाश चन्द जी केटाकेटीदेखि नेपाली कांग्रेसमा अत्यन्त मेहेनत गरेर समर्पित लागेका मानिस हुन। नेपाल विद्यार्थी संघदेखि काम गर्दै आएका हुन। अत्यन्त ज्यादा राजनीतिक संस्कार भएका, इमान्दार, सज्जन उनलाई पार्टीले उम्मेदवार दिएको छ,’ उनले भने।
वडाध्यक्षको उम्मेदवारका अन्य आँकाक्षीलाई पनि लेखकले सम्बोधन गरे। उनले अहिले नपाएपनि आलोपालोमा पाउने बताए।
‘अरु पनि धेरै गतिला मानिस हुन। उम्मेदवारी यसअघि नै पाइसकिपर्ने हो, अहिले पनि पाउनु पर्ने हो,’ लेखकले भने, ‘प्रकाश जी जतिकै मेहेनती, पुराना, अनुभवी साथीहरु हुनुहुन्छ। तर आलोपालो गर्ने हो।’
गृहमन्त्री लेखकले कांग्रेस उम्मेदवार प्रकाश चन्दलाई उपचुनाव जिताउन सहयोग गर्नु पर्ने बताए। यसले कांग्रेसलाई नै सहयोग हुने उनको भनाइ थियो।
‘मतदाता भएकाहरुले मतदान गर्नुहोस्, बाहिरिका मान्छेले ६ नम्बर वडामा रहेका आफ्ना आफन्त, इष्टमित्रलाई भन्नुहोस्,’ लेखकले भने, ‘उपचुनावमा प्रकाशलाई सहयोग गर्नुहोस्। यो प्रकाशलाई गरेको सहयोग होइन। नेपाली कांग्रेसकै लागि हो।’
