धनगढी । कैलालीमा पुलको निर्माण कार्य तोकिएको समयावधिभन्दा १४ महिनाअगाडि नै पूरा भएको छ । बर्दगोरिया गाउँपालिका–३ स्थित सेती लोकमार्गमा पर्ने काँडा खोला पुल तोकिएको समयावधिभन्दा अगाडि बनेको हो । दुई स्पानको सो पुलको लम्बाइ ८५ मिटर रहेको छ ।
२०७९ साल असार २९ गते काँडा खोला पुल निर्माणको ठेक्का सम्झौता भएको थियो । २०८१ चैत १३ गतेभित्र काम पूरा गर्ने गरी एएनके कन्स्ट्रक्सन कम्पनी प्रालि काठमाडौँले ठेक्का पाएको हो ।
सो कम्पनीले माघ पहिलो साता नै पुल निर्माणको काम सम्पन्न गरेर जनप्रतिनिधि र जनताबाट वाहवाही पाएको छ । गाउँपालिकाका अध्यक्ष कर्णबहादुर कुँवरले माघ ४ गते भव्य समारोहकाबिच पुलको उद्घाटन गरेका छन् ।
