महेन्द्रनगर । कञ्चनपुरको लालझाडीमा बाघको आक्रमणबाट बेलौरीकी एक महिला घाइते भएकी छिन् ।
बिहीबार अपराह्न लालझाडी गाउँपालिका वडा नम्बर ६ ढक्कास्थित जङ्गलमा च्याउ टिप्न गएका दशरबाह्र जना महिलामध्ये बेलौरी नगरपालिका वडा नम्बर ९ डाँडाकुण्डा बस्ने २५ वर्षीया बिन्दु डगौरालाई बाघले आक्रमण गरेको स्थानीय प्रेमबहादुर चन्दले बताए ।
शुक्लाफाँटा राष्ट्रिय निकुञ्जबाट आएको पाटे बाघले डगौरा माथि आक्रमण गर्दा सँगैका दौँतरीहरूले होहल्ला गरेपछि बाघ भागेको बताइएको छ ।
बाघको आक्रमणबाट डगौराको आँखा र टाउको पछाडि चोट लागेको छ । बेलौरी स्थित जगदम्बा अस्पतालमा उपचार पश्चात् थप उपचारका लागि धनगढी पठाइएको छ । डगौराको अन्य स्वास्थ्य अवस्था सामान्य छ ।
