महेन्द्रनगर । नजिकैको भारतीय बजार बनबासा र चकरपुरको बीचमा रहेको जंगलमासडक दुर्घटना हुँदा नेपाली मूलको एकै परिवारका चारजनाको मृत्यु भएको छ ।
चकरपुरको मुडेलास्थित गोयल कलोनीमा बसोबास गर्दै आएका ६० वर्षीय नेमबहादुर चन्द, उनकी पत्नि ५५ वर्षिया सरस्वति चन्द तथा बुहारीहरु ४२ वर्षिया नर्मदा चन्द र ४२ वर्षिया कल्पना चन्दको दुर्घटनामा मृत्यु भएको हिन्दी अखबार अमर उजाला दैनिकले समाचार प्रकाशित गरेको छ ।
कल्पनाको माइती भीमदत्त नगरपालिका–४ गोबरैया भएको खुलेको छ । चन्द परिवार नेपाली मूलको भएको महेन्द्रनगरमा रहेका पारिवारिक मित्रहरुले बताएका छन् ।
शनिबार दुईवटा स्कुटीमा आफन्त भेटघाट गर्न महेन्द्रनगर आएका चारैजना दिउँसो चकरपुर फर्कंदै गरेको बेला दुर्घटना भएको सो अखबारमा उल्लेख ।
राष्ट्रिय राजमार्गको चकरपुर–बनबसा खण्डको जुरिया नालामा एउटा कारले दुबै स्कुटीलाई ठक्कर दिंदा दुर्घटना भएको बताइएको छ । प्रहरीलाई उधृत गर्दै अमर उजालाले कारको चालक फरार भएको जनाएको छ ।
