महेन्द्रनगर । निर्माण व्यवसायी संघ कञ्चनपुरले १५ औं राष्ट्रिय निर्माण दिवस मनाएको छ । बिहिबार निर्माण व्यवसायी संघ कञ्चनपुरले महेन्द्रनगरको अनाथालयमा खाद्य सामग्री वितरण गर्दै १५ औं राष्ट्रिय निर्माण दिवस मनाएको हो ।
समाज कल्याण अञ्चल बाल अनाथालय महेन्द्रनगरका बालबालिकाहरुको लागी खाद्य सामग्री वितरण गर्दै आफुहरुले १५ औं राष्ट्रिय निर्माण दिवस मनाएको निर्माण व्यवसायी संघ कञ्चनपुरका उपाध्यक्ष देव बहादुर चन्दले बताए ।
जिल्ला अध्यक्ष निरञ्जन प्रसाद भट्टको अनुपस्थितीमा कार्यवाहक अध्यक्ष तथा निर्माणका वरिष्ठ उपाध्यक्ष राजेन्द्र बहादुर चन्दको अध्यक्षतामा उक्त खाद्यान्न वितरण कार्यक्रम सम्पन्न भएको हो ।
कार्यक्रममा सुदूर पश्चिम प्रदेश निर्माण व्यवसायी महासंघका पूर्व अध्यक्ष एवं जिल्लाका सल्लाहकार लोक बहादुर ठकुराठीको प्रमुख आतिथ्यमा उक्त कार्यक्रम आयोजना गरिएको हो ।
संघको कार्यालयमा रहेको राष्ट्रिय निर्माणको झण्डोत्तोलन गर्दै अनाथालयका बालबालिकाहरुलाई खाजा नास्ता र खाद्य सामग्री वितरण गरिएको जिल्ला कोषाध्यक्ष दिपक भट्टले बताए । कार्यक्रममा जिल्लाका अधिकांश निर्माण व्यवसायीहरुको उपस्थिती रहेको थियो ।
