कञ्चनपुर । नेपाल–भारत सीमा क्षेत्रमा सशस्त्र प्रहरी बल (एपीएफ) नेपाल र भारतको सशस्त्र सीमा बल (एसएसबी) को संयुक्त टोलीले १.१८ ग्राम ब्राउन सुगर (हेरोइन) सहित दुई नेपाली नागरिकलाई पक्राउ गरेको छ। संयुक्त टोलीले उनीहरूको साथबाट भारतीय नम्बर प्लेट भएको एउटा मोटरसाइकल र दुईवटा टचस्क्रिन मोबाइल फोनसमेत बरामद गरेको छ।
नेपाल–भारत सीमा क्षेत्रअन्तर्गत कञ्चनपुरको पुनर्वास नगरपालिका–४ र बेलौरी नगरपालिका–१ नजिक पर्ने कारगिल डाँडा तथा फटिया थापा चोक सीमा सुरक्षा पोस्ट (बीओपी) क्षेत्रको सीमा स्तम्भ नम्बर ७६९/२३ नजिक बिहीबार बिहान करिब ११ः४५ बजे उनीहरू पक्राउ परेका हुन्। संयुक्त सुरक्षा टोलीले शङ्कास्पद गतिविधिका आधारमा जाँच गर्ने क्रममा उनीहरूलाई नियन्त्रणमा लिएको हो।
प्राप्त जानकारीअनुसार, नेपाल एपीएफको ३५औँ बाहिनी, नेपाल प्रहरीको फटिया पोस्ट र कारगिल डाँडा पोस्ट तथा एसएसबीको ४९औँ बटालियनअन्तर्गत बसाहीस्थित ‘बी’ कम्पनीका सुरक्षाकर्मी सम्मिलित संयुक्त टोलीले उनीहरूमाथि खानतलासी गरेको थियो।
नेपाल प्रहरीको फटिया पोस्टका सहायक प्रहरी नायब निरीक्षक (असई) मान सिंह धामी, नेपाल एपीएफको कारगिल डाँडा पोस्टका प्रहरी नायब निरीक्षक (सई) केवल ओली तथा एसएसबीका कमान्डेन्ट शेर सिंह चौधरीसहितको संयुक्त टोलीले उक्त कारबाही गरेको जनाइएको छ। नेपाल एपीएफका वरिष्ठ हवल्दार भीमबहादुर बोहराको नेतृत्वमा खटिएको टोलीमा एसएसबीका जवान प्रदीप र अनिल कुमारसमेत सहभागी थिए।
खानतलासीका क्रममा कौशल चौधरीको साथबाट ब्राउन सुगरका तीनवटा साना पुडिया फेला परेका थिए। बरामद पदार्थको प्लास्टिकसहित कुल तौल २.१५ ग्राम र प्लास्टिकबाहेक शुद्ध तौल १.१८ ग्राम रहेको बताइएको छ।
प्रारम्भिक सोधपुछका क्रममा चौधरीले उक्त पदार्थ व्यक्तिगत प्रयोगका लागि भारतको बसाही बजारस्थित एउटा किराना पसलबाट खरिद गरेको बताएको सुरक्षा स्रोतले जनाएको छ।
पक्राउ पर्नेमा कैलाली जिल्लाको जोशीपुर निवासी चैत राज चौधरीका छोरा कौशल चौधरी र कञ्चनपुर जिल्लाको वाईसी विचवा निवासी दल बहादुर कामीका छोरा विशाल विक रहेका छन्।
संयुक्त टोलीले घटनास्थलबाट भारतीय दर्ता नम्बर ०२पी–९६९५ भएको एउटा मोटरसाइकल र दुईवटा टचस्क्रिन मोबाइल फोनसमेत बरामद गरेको छ।
बरामद लागुऔषध तथा अन्य सामग्री आवश्यक कानुनी प्रक्रियाका लागि सम्बन्धित निकायमा बुझाउने प्रक्रिया अघि बढाइएको जनाइएको छ। घटनाबारे थप अनुसन्धान भइरहेको र पक्राउ परेका दुवै जनामाथि प्रचलित कानुनबमोजिम आवश्यक कारबाही प्रक्रिया अगाडि बढाइने बताइएको छ।
