महेन्द्रनगर । लगातारको वर्षाले कञ्चनपुरका अधिकांश भू–भागमा किसानले लगाएको धानबाली डुबानमा परेको छ ।
काटेर खेतमै राखेको र काट्न तयार भएको धानबाली वर्षाका कारण डुबानमा पर्दा किसानहरू मर्कामा परेका छन् ।
जीविकोपार्जनका लागि बेच्न र वर्षभरि खानका लागि खेतमा तयार भइरहेको धानबाली भित्र्याउन नपाउँदा किसानहरू चिन्तित बनेका छन् ।
यो असोज महिनामा मात्रै पनि कञ्चनपुरमा ३ पटक भारी वर्षा हुँदा बाढी, डुबान, कटान तथा पटानले ठूलो क्षति भएको छ ।
यसअघि, यही असोज १ गते र असोज ९ गते आसपासको समयमा पनि कञ्चनपुरमा बाढी, डुबान, कटान तथा पटानले जनजीवन प्रभावित बनेको थियो ।
गत वर्ष असोज ३० देखि कार्तिक २ गते सम्मको अविरल वर्षाले पश्चिम तराईका थुप्रै किसानले काटेर भित्र्याउन मात्रै बाँकी रहेको धानबाली खेतमै उम्रिएर कुहिएको थियो ।
यस वर्ष पनि सोही परिस्थिति सृजना हुने हो कि भन्नेमा किसानहरू सशङ्कित भएका छन् ।
