एजेन्सी: भारत–नेपाल सीमामा गस्तीका क्रममा सीमा सुरक्षा बल (एसएसबी) को ४९औँ बटालियनले १ लाख ४९ हजार नेपाली रुपैयाँ र मोटरसाइकलसहित दुई नेपाली नागरिकलाई पक्राउ गरेको छ।
४९औँ बटालियनका कमान्डेन्ट शेर सिंह चौधरीको निर्देशन तथा बसही ‘बी’ कम्पनीका इन्स्पेक्टर रामकुमार यादवको नेतृत्वमा सञ्चालित गस्तीका क्रममा उनीहरू पक्राउ परेका हुन्।
बसही ‘बी’ कम्पनीका इन्स्पेक्टर रामकुमार यादवका अनुसार सीमा क्षेत्रमा गस्ती गर्ने क्रममा शङ्कास्पद अवस्थामा हिँडिरहेका दुई जनालाई रोकेर जाँच गरिएको थियो। जाँचका क्रममा उनीहरूको साथबाट १ लाख ४९ हजार नेपाली रुपैयाँ र एउटा मोटरसाइकल बरामद भएको थियो।
सोधपुछका क्रममा पक्राउ पर्नेमा नेपालको कञ्चनपुर जिल्लाको कालिका–०८ निवासी ४२ वर्षीय धनबहादुर तामाङ र ४१ वर्षीय नयनकुमार तामाङ रहेको खुलेको जनाइएको छ। नयनकुमार धनबहादुरका छोरा रहेको बताइएको छ।
इन्स्पेक्टर यादवका अनुसार आवश्यक प्रक्रिया पूरा गरेपछि बरामद गरिएको नेपाली रुपैयाँ, मोटरसाइकल र पक्राउ परेका दुवै जनालाई थप कानुनी कारबाहीका लागि पलिया भन्सार कार्यालयमा बुझाइएको छ।
