दोधारा–चाँदनी । तीजको अवसरमा दोधारा चाँदनी नगरपालिकामा एक दिने तीज विशेष निःशुल्क मेहेन्दी लगाउने कार्यक्रम सोमबार भव्य रूपमा सम्पन्न भएको छ । कार्यक्रमको उद्घाटन नगरपालिकाकी उपप्रमुख गङ्गा जोशीले आफ्नै हातमा मेहेन्दी लगाएर गरेकी हुन् ।
सैपाल ग्यास प्रा.लि., गोदावरी कैलालीको आयोजनामा र रावत ग्यास एजेन्सी (कालिका बजार–९), जय हमशेखर ट्रेडर्स (गार्डेन चोक–६ हेल्थ पोस्ट), र श्री बोहरा ट्रेडर्स (बाबाथान बजार–७) को सहकार्यमा कालिका हाटबजार–९ र चादनी हाटबजार–४ मा उक्त कार्यक्रम सम्पन्न भएको हो ।
कार्यक्रममा स्थानिय स्तरमा सञ्चालनमा रहेका १० जना महिला ब्यूटी पार्लर व्यवसायीहरूलाई परिचालन गरिएको हो । बिहान ९ बजेदेखि साँझ ६ बजेसम्म सञ्चालन भएको कार्यक्रममा दुई स्थानमा गरी करिब १,५०० जना महिला दिदीबहिनीहरूलाई मेहेन्दी लगाइएको कालिका बजार व्यवस्थापन समितिका अध्यक्ष जङ्गु रावतले जनाए ।
कार्यक्रमले तीज पर्वलाई अझ रमाइलो र सजीव बनाउन सहयोग पुगेको स्थानीय बासिन्दा तुलसी रावतले बताउनुभयो। उहाँले महिलाहरूको चाडमा यस प्रकारको सामाजिक कार्यक्रम सराहनीय रहेको समेत उल्लेख गरे ।
कार्यक्रमको समन्वय कालिका हाटबजार व्यवस्थापन समितिले गरेको थियो। स्थानीय समुदायमा महिलामैत्री र सांस्कृतिक प्रवद्र्धन गर्ने खालका यस्ता कार्यक्रमले उत्साह थपेको छ ।
