नेपाली कांग्रेसका सभापति तथा पूर्व प्रधानमन्त्री शेरबहादुर देउवाले शिक्षा क्षेत्रमा पूर्वाधारको विकाससँगै गुणस्तरीय शिक्षामा पनि ध्यान दिनुपर्ने बताएका छन्। कैलालीको गौरीगङ्गा नगरपालिकास्थित चौमाला बहुमुखी क्याम्पसको नवनिर्मित भवनको उद्घाटनको अवसरमा उनले भौतिक संरचनासँगै प्राविधिक र गुणस्तरीय शिक्षामा जोड दिनुपर्नेमा जोड दिए।
“शैक्षिक क्षेत्रमा धेरै पूर्वाधार निर्माण भएका छन्, अब गुणस्तरीय शिक्षासँगै प्राविधिक शिक्षामा जोड दिनुपर्छ, म सहयोग गर्न तयार छु,” देउवाले भने। उनले सुदूरपश्चिमको शिक्षा क्षेत्रमा सुधार ल्याउन आफू सधैं तयार रहेको पनि स्पष्ट पारे। “मैले यहाँका सबै समस्याहरु थाहा पाएको छु, जुनसुकै सहयोग मैले गर्न सक्छु,” उनले भने।
क्याम्पस सञ्चालक समितिका अध्यक्ष दिनेशराज जोशीले क्याम्पसको सुरुआत भए पनि अझै धेरै काम बाँकी रहेको र त्यसका लागि देउवाबाट सहयोगको अपेक्षा गरेको बताएका थिए। यस अवसरमा नेपाली कांग्रेसका प्रदेश सभापति वीरबहादुर बलायर र सुदूरपश्चिमका निवर्तमान मुख्यमन्त्री दीर्घबहादुर सोडारीले पनि देउवाको नेतृत्वमा सुदूरपश्चिमको शिक्षा र विकासका समस्याहरु समाधान गर्न सकिने विश्वास व्यक्त गरे।
सभापति देउवाले त्यहाँको धार्मिक स्थल वेहेडावावा मन्दिरको पनि दर्शन गरे र स्थानीय जनताको स्वागतमा सहभागी भए। त्यहाँ पुगेपछि उनले गेटा अस्पतालको निरीक्षण पनि गरे र अस्पतालको विकासका लागि सहयोग गर्ने प्रतिबद्धता जनाए। “गेटा अस्पतालको उन्नतिको लागि म पूर्ण सहयोग गर्नेछु, यसले स्थानीय जनतालाई स्वास्थ्य सेवामा सहजता पुर्याउने छ,” उनले भने।
