कैलालीको धनगढी उपमहानगरपालिका–११ बाँसखेडाका परशुनारायण चौधरीले विगत १४ वर्षदेखि व्यावसायिक बङ्गुरपालन गर्दै आएका छन्।
चौधरीको फार्ममा हाल भालेपोथी गरेर २७ वटा बङ्गुर छन्। उनको फार्मबाट वार्षिक ३० लाख बराबरको बङ्गुरका पाठापाठी बिक्री हुन्छ।खर्च कटाएर औसतमा वार्षिक १२ लाख आम्दानी हुने गरेको उनले बताए। व्यवसाय फस्टाउँदै गएपछि आम्दानी पनि राम्रै हुन थालेको उनले बताएका हुन। बङ्गुरको पाठापाठी हुर्काएर बिक्री गर्ने उमेर पुग्न करिब एक महिना लाग्छ। एउटा पाठा वा पाठी छ हजारमा बिक्री गर्ने गरेको उनले बताए।
बङ्गुरपालनबाट गरेको कमाइले उनले गाउँमा इँटाभट्टा र मसला उद्योग सञ्चालन गरेको बताए। “बङ्गुरपालन राम्रै फापेको छ”, उनले भने, “यो व्यवसायको कारोबार बढ्दै गयो र फाइदा हुँदै गयो, अहिले गाउँमा सानो इँटाभट्टा र मसला उद्योग सञ्चालन गरेको छु, जसबाट घर परिवारका सदस्यले काम पाए।”चौधरीले धनगढीस्थित भेटेरिनरी अस्पताल तथा पशु सेवा विज्ञ केन्द्रबाट यसै वर्ष ९० हजार अनुदान प्राप्त गरेका छन्।
अनुदान रकमले व्यवसाय गर्न अझै सहज भएको उनले बताए। उनी सफल कृषकका रूपमा समेत पुरस्कृत भएका छन्।सुरुका वर्षमा मासु बिक्री गर्ने उनले मासुका लागि बजार नपाएपछि पाठापाठी बिक्री गर्न थालेको बताए। किसानलाई व्यवसाय सहजताका लागि सरकारी तवरबाट कोल्डस्टोर, वधशाला स्थापना खरिदिए अझै सहज हुने उनले बताए।
