काठमाडौँ । नेपाल प्रहरीको ३१ औँ महानिरीक्षकमा दीपक थापा नियुक्त भएका छन्। सोमबार बसेको मन्त्रिपरिषद् बैठकले थापालाई प्रहरी महानिरीक्षकका नियुक्त गरेको हो ।
आइजी वसन्त कुँवरको कार्यावधि सोमबार सकिँएको छ। थापा केन्द्रीय अनुसन्धान ब्युरोका प्रमुख थिए। उनले आगामी छ महिना प्रमुख प्रमुखको जिम्मेवारी सम्हाल्नेछन्।
नयाँ महानिरीक्षकका लागि थापाबाहेक प्रहरी प्रशिक्षण प्रतिष्ठान प्रमुख सुदीप गिरी र उपत्यका प्रहरी कार्यालय प्रमुख टेकबहादुर तामाङ पनि प्रतिष्पर्धामा थिए। तर, तामाङ र गिरीलाई पछि पार्दै थापा महानिरीक्षक बनेका हुन्।
थापा, गिरी र तामाङ २०५२ भदौ १९ गते एकैदिन सेवा प्रवेश गरेका अधिकारीहरू हुन्। नेपाल प्रहरीमा हालका तीनै जना प्रतिस्पर्धी एकै ब्याचमा भर्ना भए पनि एआइजी थापा एआइजी पदमा बढुवा हुँदा प्रहरी महानिरीक्षक कुँवरसँगै बढुवा भएका हुन्। यसअनुसार एआइजीको वरियतामा थापा १ नम्बरमा थिए।
२६ फागुन २०७९ मा एआइजीमा सिफारिस भएका दीपक थापालाई ६ चैत २०७० को मन्त्रिपरिषद् बैठकले एआईजीमा बढुवा गरेको थियो। थापा एआइजी भएको दुई सातापछि गिरी र तामाङ एआइजीमा बढुवा भएका थिए। १३ चैतमा सुदीप गिरी र टेकबहादुर तामाङ एआइजी बढुवाको लागि सिफारिस भएका थिए।
अवकाशमा जान लागेका कुँवरलाई आइतबार नै सशस्त्र प्रहरी हेडक्वाटरले बिदाइ गरिसकेको छ भने सोमबार प्रहरी हेडक्वाटरले कुँवरको औपचारिक बिदाइ गरेको छ।
नेपाल प्रहरी नियमावलीले गरेको व्यवस्थाअनुसार सेवा अवधिको ३० वर्षे समय पूरा गरी प्रहरी महानिरीक्षक कुँवरले सोमबार अवकाश पाएका हुन्। उनीसँगै पाँच एआइजी र तीन डीआइजीले पनि चैत ४ गते मध्यरातबाट अवकाश पाउँदैछन्। उनीहरूले २०५१ चैत ५ गते इन्स्पेक्टर पदबाट प्रहरीको जागिर सुरु गरेका हुन्।
चैत ४ मा आइजी कुँवरसहित प्रधान कार्यालयमा कार्यरत एआइजीमध्ये अपराध अनुसन्धान विभागका प्रमुख कुवेर कडायत, कार्य विभाग ९अपरेशन० प्रमुख बुद्धिराज गुरुङ, मानवस्रोत विभाग प्रमुख दुर्गा सिंह, प्रशासन विभाग प्रमुख टेकप्रसाद राई र प्रदेश समन्वय विभाग प्रमुख जनक भट्टराई पनि सँगै अवकाश भएका छन्। डीआईजीमध्ये गण्डकी प्रदेश प्रमुख भोलाबहादुर रावल र सुदूरपश्चिम प्रदेश प्रमुख गणेश चन्द पनि अवकाश भएका छन्।
