महेन्द्रनगर । सुदूरपश्चिम प्रदेशका कञ्चनपुर र कैलाली जिल्लामा निर्माण भइरहेको हुलाकी राजमार्गको बाँकी काम पूरा गर्न बजेट अभावले समस्या निम्त्याएको छ। चालु आर्थिक वर्षको लागि सङ्घीय सरकारले ३२ करोड ५० लाख रुपैयाँ बजेट पठाएको थियो, तर उक्त बजेटमध्ये २० करोड ६५ लाख रुपैयाँ गत आवको दायित्व भुक्तानीमा खर्च भएको छ। यस कारण, निर्माण कम्पनीहरूले काममा निरन्तरता दिएको भए पनि, हुलाकी राजमार्गको आयोजना कार्यालय धनगढीमा हाल बजेटको अभाव छ।
हुलाकी राजमार्ग आयोजनाका प्रमुख मुकुन्दप्रसाद लामिछानेका अनुसार, थप बजेटको मागका लागि प्रक्रिया अगाडि बढाइएको छ, तर बजेट नभएका कारण निर्माण कार्यलाई पूर्ण रूपमा अघि बढाउन समस्या उत्पन्न भएको छ। कैलालीको लम्की–टीकापुर खण्ड र भजनी–धनगढी खण्डमा काम जारी छ भने, कञ्चनपुर जिल्लामा हुलाकी राजमार्ग अन्तर्गत विभिन्न खण्डहरूमा काम भइरहेको छ।
धनगढीदेखि भजनीसम्मको स्तरोन्नतिको काम चालु आवमै सक्ने लक्ष्य राखिएको थियो, तर बजेट अभावका कारण निर्माणमा ढिलाइ हुने संभावना देखिन्छ। योजना कार्यालयका अनुसार, निर्माण कम्पनीले हालसम्म २० करोड रुपियाँ बराबरको काम सम्पन्न गरेका छन्, तर सोको भुक्तानीका लागि बजेट उपलब्ध छैन।
कञ्चनपुरमा ४२ किलोमिटर हुलाकी राजमार्ग निर्माण भइरहेको छ, जसको ४-५ किलोमिटरमा काम बाँकी छ। कञ्चनपुर र कैलालीमा केही स्थानमा पुल निर्माण पनि जारी छ। योजनाका प्रमुख लामिछानेका अनुसार, थप बजेटको व्यवस्था नभएमा कामको प्रगति ढिलाइ हुन सक्छ, र कञ्चनपुरमा सबै काम चालु आवभित्रै सक्ने लक्ष्यलाई चुनौती पु-याउन सक्छ।
