राष्ट्रिय स्वतन्त्र पार्टी (रास्वपा)ले डा. मुकुल ढकाललाई साधारण सदस्यसमेत नरहने गरी पार्टीबाट निष्काशन गर्ने निर्णय गरेको छ। मंगलबार बसेको केन्द्रीय कमिटी बैठकमा पार्टी अनुशासन र आचरण विपरीत गतिविधि गरेको आरोपमा उनलाई निष्काशन गर्ने निर्णय लिइएको हो।
यसअघि, पार्टीले डा. ढकाललाई महामन्त्री र प्रवक्ताको पदबाट हटाइसकेको थियो। अनुशासन उल्लङ्घनको आरोपमा उनलाई ३५ दिनको समय दिएर स्पष्टीकरण मागिएको थियो। तर, उक्त अवधिमा ढकालले पार्टी सभापति रवि लामिछाने, उपसभापतिहरू स्वर्णिम वाग्ले र डीपी अर्याल लगायतका केन्द्रीय नेताहरूको आलोचना गर्दै वक्तव्य दिएका थिए। यसले पार्टीलाई नकारात्मक असर गरेको निष्कर्ष निकाल्दै अनुशासन आयोगले उनलाई साधारण सदस्यको रूपमा पनि राख्न नहुने सुझाव दिएको थियो।
यससँगै, केन्द्रीय समितिले उनलाई साधारण सदस्यबाट किन नहटाउने भन्ने स्पष्टीकरण सोधेको थियो। अन्तिम पटक भदौ ५ गतेको बैठकमा २४ घण्टे स्पष्टीकरणको समय दिइएको थियो, तर जवाफमा ढकालले सभापति रवि लामिछानेलाई ‘अपराधी करार गरिछाड्ने’ भन्ने बयान दिएपछि पार्टीले उनलाई निष्काशन गर्ने निर्णय गरेको हो।
रास्वपाको यो कदमले डा. ढकालको पार्टीबाट पूर्ण बहिष्कार भएको छ, र पार्टीको आन्तरिक विवादले थप तनाव उत्पन्न भएको छ।
