- खुकुरी देखाएर धम्की दिँदै जंगलमा लगेर कुटपिट गरेको आरोप; घटनाको निष्पक्ष अनुसन्धान गरी पीडितलाई न्याय दिलाउन माग
, कञ्चनपुर, कञ्चनपुरको बेलौरी नगरपालिका–१, रतनपुरमा नौ वर्षीय बालकमाथि अपहरण गरी जंगलमा लगेर मरणासन्न हुने गरी कुटपिट तथा अमानवीय व्यवहार गरेको आरोपमा प्रहरीले पाँच जनाको नाम सार्वजनिक गरेको छ। कलिलो उमेरका बालकमाथि खुकुरी देखाएर धाकधम्की दिँदै कुटपिट गरिएको घटनाले समाजमा बालबालिकाको सुरक्षा र मानवताको अवस्थाबारे गम्भीर प्रश्न उठाएको छ।
जिल्ला प्रहरी कार्यालय कञ्चनपुरका अनुसार घटनामा संलग्न रहेको आरोपमा पक्राउ परेका पाँच जनाको विवरण सार्वजनिक गरिएको हो।
प्रहरीले सार्वजनिक गरेको विवरणअनुसार पक्राउ पर्नेमा बेलौरी नगरपालिका–१, रतनपुरका २१ वर्षीय आशिष बिष्ट, १९ वर्षीय दिलीप भट्ट, २१ वर्षीय शंकर सुनार, २३ वर्षीय सुजित अधिकारी र २२ वर्षीय मिलन तिरुवा रहेका छन्।
प्रहरीका अनुसार घटनाबारे इलाका प्रहरी कार्यालय बेलडाँडीमा जानकारी प्राप्त भएपछि उनीहरूलाई नियन्त्रणमा लिइएको हो। घटनाको गम्भीरतालाई ध्यानमा राख्दै उनीहरूमाथि अपहरण, शरीर बन्धक, ज्यान मार्ने उद्योग तथा अपमानजनक र अमानवीय व्यवहारसम्बन्धी कसुरमा मुद्दा दर्ता गरी आवश्यक अनुसन्धान अघि बढाइएको जिल्ला प्रहरी कार्यालय कञ्चनपुरले जनाएको छ।
बालबालिकामाथिको हिंसा कुनै पनि अवस्थामा स्वीकार्य हुँदैन
एउटा नौ वर्षीय बालकमाथि खुकुरी देखाएर धम्की दिने, जंगलमा लगेर कुटपिट गर्ने र अमानवीय व्यवहार गर्ने जस्ता आरोपले समाजलाई गम्भीर रूपमा झकझकाएको छ। बालबालिका समाजका सबैभन्दा संवेदनशील सदस्य हुन्। उनीहरूको सुरक्षा, सम्मान र भयमुक्त वातावरणमा हुर्कन पाउने अधिकार सुनिश्चित गर्नु परिवार, समुदाय र राज्यको साझा दायित्व हो।
कुनै पनि व्यक्तिलाई रिसइबी, आवेग वा शक्तिको घमण्डमा बालबालिकामाथि हिंसा गर्ने अधिकार छैन। यस्ता घटनालाई सामान्य विवादका रूपमा लिएर बेवास्ता गर्नुको सट्टा कानुनी प्रक्रियामार्फत सत्यतथ्य सार्वजनिक गर्दै दोषी ठहरिएका व्यक्तिलाई कानुनअनुसार कारबाही गरिनुपर्छ।
यस घटनाको निष्पक्ष र प्रभावकारी अनुसन्धान गरी पीडित बालकलाई न्याय दिलाउन प्रहरी प्रशासनले कुनै पनि दबाब वा प्रभावमा नपरी काम गर्नुपर्ने आवश्यकता छ। साथै, बालकको शारीरिक तथा मानसिक अवस्थालाई ध्यानमा राख्दै आवश्यक उपचार, मनोसामाजिक परामर्श र सुरक्षाको व्यवस्था गर्न सम्बन्धित निकायको ध्यान जान जरुरी छ।
