कैलाली — टिभी टुडे टेलिभिजनका सुदूरपश्चिम प्रदेश निर्देशक तथा पत्रकार **अनिल पन्त** सम्मानित भएका छन्। कैलालीको गोदावरी नगरपालिका–६, लालपुरमा अवस्थित **कल्प पाठशाला**ले आफ्नो **१६औँ वार्षिक उत्सव २०८२** को अवसरमा पत्रकारिता तथा सञ्चार क्षेत्रमार्फत समाजमा पुर्याएको उल्लेखनीय योगदानको कदर गर्दै पन्तलाई दोसल्ला ओढाएर सम्मान गरेको हो।
दार्चुला जिल्लामा स्वर्गीय धनदेव पन्त र उमादेवी पन्तको सुपुत्रका रूपमा जन्मिएका पन्त विगत करिब एक दशकदेखि पत्रकारिता क्षेत्रमा सक्रिय रहँदै आएका छन्। उनले विशेषगरी सुदूरपश्चिम प्रदेशका दुर्गम तथा पिछडिएका क्षेत्रका समस्या, शिक्षा र स्वास्थ्यका सवाल, सामाजिक विकृति–विसंगति, भ्रष्टाचार तथा अन्यायविरुद्ध निरन्तर आवाज उठाउँदै जनतालाई सुसूचित गर्ने महत्वपूर्ण भूमिका निर्वाह गर्दै आएका छन्।
टिभी टुडे टेलिभिजनमार्फत तथ्यपरक, निष्पक्ष र जनमुखी समाचार सम्प्रेषण गर्दै समाजमा सकारात्मक परिवर्तन ल्याउन योगदान पुर्याएको भन्दै विद्यालयले उनको पत्रकारितात्मक कर्मको उच्च मूल्याङ्कन गरेको जनाएको छ।
सम्मान कार्यक्रम विद्यालय व्यवस्थापन समितिका पदाधिकारी, शिक्षक, अभिभावक, विद्यार्थी तथा स्थानीय समाजसेवीहरूको उल्लेखनीय उपस्थितिमा सम्पन्न भएको थियो।
कल्प पाठशालाले प्रत्येक वर्ष आफ्नो वार्षिक उत्सवको अवसरमा शिक्षा, सञ्चार, खेलकुद तथा सामाजिक क्षेत्रमा योगदान पुर्याउने व्यक्तित्वलाई सम्मान गर्दै आएको विद्यालय प्रशासनले जनाएको छ।
