कञ्चनपुर: जिल्लाको दक्षिणी क्षेत्रमा चाडपर्व नजिकिदै गर्दा खेलकुदको चहलपहल बढेको छ । फुटबलको क्रेज रहेको पुनर्वास नगरपालिका अन्तर्गत पुनर्वास ७ मा १५औं रनिङ्ग चाँदीकप खुल्ला पुरुष फुटबल प्रतियोगिता-२०८२ शुरू हुने भएको छ।
खेलकुदलाई प्रवद्र्धन गर्ने उद्देश्यका साथ पुनर्वास नगरपालिका–७ मा सिद्धार्थ युवा क्लबले बिगत बर्षहरुमा झै यस बर्ष पनि आयोजकले १५ औँ रनिङ्ग चाँदीकप खुल्ला पुरुष फुटबल प्रतियोगिता–२०८२ थप ब्यवस्थापनका साथ सञ्चालन गर्ने भएको छ।
आयोजक सिदार्थ युवा क्लबक क्लबका अध्यक्ष प्रकाश तामाङका अनुसार प्रतियोगिता आगामी असोज ११ गते देखि सुरु हुनेछ । स्थानीय युवा खेलाडीलाई प्रोत्साहन गर्नुका साथै जिल्लामा खेल पर्यटनको सम्भावना बढाउने उद्देश्यले प्रतियोगिता आयोजना गर्न लागिएको उहाँले बताउनुभयो ।
प्रतियोगितामा विभिन्न जिल्ला तथा भौगोलिक क्षेत्रका नाम चलेका टिमहरुले प्रतिस्पर्धा गर्नेछन् । यसअघि सम्पन्न संस्करणहरुले पनि ठूलो जनसमूहको आकर्षण पाएको आयोजकले जनाएको छ । कञ्चनपुरको पुनर्वासमा हुने यो प्रतियोगिता जिल्लाकै उत्कृष्ट खेल मध्येको एक मानिने क्लवका सचिब सुक बहादुर तामाङले बताउनुभयो ।
प्रतियोगीतामा विजेता टिमले २ लाख २२ हजार रुपैयाँ नगद पुरस्कार तथा आकर्षक ट्रफी, पदक र प्रमाणपत्र प्राप्त गर्ने छ भने उपविजेता टिमले १ लाख ११ हजार रुपैयाँ नगद सहित पदक तथा प्रमाणपत्र प्राप्त गर्ने क्लबले जनाएको छ । प्रतियोगिताले स्थानीय स्तरमा मात्र नभई क्षेत्रीय स्तरका खेलाडीलाई पनि आफ्नो प्रतिभा देखाउने अवसर प्रदान गर्ने विश्वास गरिएको छ । आयोजकले यस पालीको खेलमा कञ्चनपुर, कैलाली, डडेलधुरा, बाँके लगायतका जिल्लाबाट समेत टिम सहभागी हुने अपेक्षा गरिएको छ ।
फुटबललाई ग्रामीण भेगसम्म र्पुयाउने र खेलकुदमैत्री समाज निर्माण गर्ने उद्धेश्यले निरन्तर आयोजना हुँदै आएको यो प्रतियोगिता दक्षिणी भेगका खेल प्रेमीका लागि ठूलो पर्व सरह मानिन्छ प्रत्येक खेलमा हजारौं दर्शकहरुको उपस्थिति हुने भएकाले यसले स्थानीय व्यवसाय र पर्यटन प्रवद्र्धनमा समेत योगदान र्पुयाउने अपेक्षा गरिएको छ । प्रतियोगिता सफल पार्न सम्पूर्ण तयारी तीव्र गतिमा भइरहेको क्लबले जनाएको छ।
