कञ्चनपुर । बेलडाँडी गाउँपालिका–२ सिहपाल टोलकी १७ वर्षीया सम्झना भट्टको मृत्यु घटनामा संलग्न रहेको अभियोगमा उनका श्रीमान् पवन भट्ट पुर्पक्षका लागि कारागार चलान गरेको छ ।
जिल्ला अदालत कञ्चनपुरले दिएको आदेशअनुसार सम्झनाका ससुरा हरिदत्त भट्ट र दिदी पूजा भट्ट जनही एक–एक लाख रुपैयाँ धरौटीमा रिहा भएका छन् भने सासू किरण भट्ट साधारण तारेखमा मुक्त गरिएको छ।
गत साउन १८ गते सम्झना आफ्नै घरमा झुण्डिएको अवस्थामा भेटिएकी थिइन्। घटनापछि माइती पक्षले आत्महत्या नभई हत्या भएको आशंका व्यक्त गर्दै निष्पक्ष छानबिनको माग गरेका थिए।
जिल्ला प्रहरी कार्यालयका डिएसपी सागर बोहराका अनुसार आत्महत्या दुरुत्साहनसम्बन्धी जाहेरीका आधारमा प्रहरीको टोलीले श्रीमान् सहित परिवारका अन्य सदस्यलाई नियन्त्रणमा लिएर अनुसन्धान अघि बढाएको थियो।
