बैतडी। चाडपर्वको समयमा उपभोक्ताको हकहित र बजारको अनुशासन कायम गर्नका लागि सुर्नया गाउँपालिकाले बजार अनुगमनको कार्य आरम्भ गरेको छ। अनुगमनको प्रमुख उद्देश्य भनेको कालोबजारी नियन्त्रण गर्नु, म्याद नाघेका सामग्रीको विक्रिवितरणलाई रोक्नु, र पालिकामा दर्ता नभएका पसलहरुलाई दर्ता गर्न आग्रह गर्नु हो।
गाउँपालिकाका प्रमुख प्रशासकीय अधिकृत लोगराज जोशीका अनुसार, अनुगमन टोलीले गाउँपालिका उपाध्यक्ष मञ्जु बोहराको नेतृत्वमा वडा नं १, २, ३ र ४ का विभिन्न बजारहरूमा अनुगमन गरेका छन्। सोमबारको अनुगमनमा विभिन्न स्थानबाट करीब ६ हजार रुपैयाँ बराबरको म्याद नाघेको सामग्री बरामद गरी नष्ट गरिएको जानकारी दिएका छन्।
उपाध्यक्ष मञ्जु बोहराले भने, “हाम्रो उद्देश्य बजारमा अनुशासन कायम गर्न र उपभोक्ताको हकहितको रक्षा गर्नु हो। चाडपर्वको समयमा उपभोक्तालाई सुरक्षित र गुणस्तरीय सामानको उपलब्धता सुनिश्चित गर्न हामीले यो अनुगमन थालेका हौं।”
गाउँपालिकाको अनुगमन कार्यले विभिन्न स्थानहरूमा, जस्तै सनशेरीमाण्डौं, सतबाँझ, सिउडे, र धरमघरमा पनि ध्यान केन्द्रित गरेको छ। यसका साथै, अनुगमनका क्रममा पालिकामा दर्ता नभएका पसलहरुलाई दर्ता गर्न आग्रह गरिएको छ। होटेल र किराना पसललाई मूल्यसूची राख्न र सरसफाइको विषयमा विशेष ध्यान दिन भनिएको छ।
प्रमुख प्रशासकीय अधिकृत जोशीले अनुगमनलाई निरन्तरता दिने योजना रहेको बताउँदै, चाडपर्वको समयमा मात्र नभएर अन्य समयमा पनि बजार अनुगमन जारी रहने बताएका छन्। यसले उपभोक्तालाई सुरक्षित र पारदर्शी बजार सेवा प्रदान गर्न सहयोग गर्ने अपेक्षा गरिएको छ।
