डडेल्धुरा। भित्रीमधेश क्षेत्र आलिताल गाउँपालिकामा १० शय्याको अस्पताल भवन निर्माणका लागि गरिएको काम अलपत्र परेको छ। निर्माण सम्पन्न गर्ने लक्ष्य अनुसार दुई वर्षको समयावधिमा काम पूरा गर्ने सम्झौताका बावजुद बजेट अभावले निर्माण प्रक्रिया रोकिएको हो।
२०७८ सालको असार २३ गते राजेन्द्र निर्माण सेवासँग ७ करोड ३९ लाख ९७ हजार रुपैयाँको ठेका सम्झौता भएको थियो। तर, निर्माण कार्यको समयावधि समाप्त हुँदै गर्दा पिल्लर मात्र हालिएको जानकारी प्राविधिक राजेन्द्रकुमार रावलले दिएका छन्।
सुरुमा गाउँपालिकालाई ८० लाख रुपैयाँ बजेट प्राप्त भएको थियो, तर त्यसपछि ठेकेदारले १० प्रतिशत मोबिलाइजेसन खर्च पनि नपाएको बताएका छन्। हालसम्म ८३ लाख रुपैयाँको काम सम्पन्न भए पनि १४ लाख मात्र भुक्तानी गरिएको छ।
आर्थिक वर्ष २०७९–०८० मा ३० लाख र गत वर्ष २५ लाख रुपैयाँ विनियोजन भए तापनि वास्तविकता भने भिन्न देखिन्छ। गाउँपालिकाले हालसम्म दुई पटक म्याद थपिसकेको छ।
यो अस्पताल निर्माण योजना तत्कालीन प्रधानमन्त्री केपी शर्मा ओलीले २०७७ सालमा लागू गरेका स्वास्थ्य सेवा विस्तारका लागि गरिएको पहल अन्तर्गतको हो। आलिताल अस्पताल पनि सोही योजनामा समावेश छ।
