काठमाडौँ । नेपाली कांग्रेसका सभापति शेरबहादुर देउवाले बीपी कोइराला नेपाली राजनीतिमा अहिलेसम्मकै विशिष्ट र बहुआयमिक व्यक्तित्व भएको बताएका छन् ।
![](https://nigaranikhabar.com/wp-content/uploads/2022/11/harikrishna-traders-suppliers.gif)
उनले बीपीले राजनीतिक रुपमा मात्रै नभएर साहित्यिकरुपमा पनि देशलाई उल्लेख्य योगदान गरेको भन्दै स्मरण गरे ।
![](https://nigaranikhabar.com/wp-content/uploads/2024/01/NNSWA-NEW-AD.jpg)
पूर्वप्रधानमन्त्री, कांग्रेसका संस्थापक एवं साहित्यकार बीपी कोइरालाको ११०औँ जन्म जयन्तीको अवसरमा कांग्रेस मुख्यालय सानेपामा आइतबारदेखि सुरू भएको बीपी साहित्य महोत्सवको उद्घाटन गर्दै सभापति देउवाले बीपीको बहुआयमिक व्यक्तित्व र प्रतिभाको चर्चा गरे ।
![](https://nigaranikhabar.com/wp-content/uploads/2024/01/Mantra-Hospital-MNR.webp)
‘बीपी नेपाली राजनीतिको विशिष्ट र बहुआयमिक व्यक्तित्व हुनुहुन्थ्यो । उहाँले देखाएको राजनीतिको बाटोमा अहिले पनि हामी हिँडिरहेका छौँ । उहाँका साहित्य अहिले पनि उत्तिकै शक्तिशाली छन्,’ उनले भने ।
सभापति देउवाले बीपीले साहित्य पनि सत्य घटनामा आधारित भएर लेख्ने गरेको सुनाए । ‘मैले एकपटक श्वेतभैरवी पढिसकेपछि उहाँलाई सोधेको थिएँ,’ देउवाले अघि भने, ‘त्यसबेला मैले कथाको कुरा सोध्दा उहाँले घुँडामा रहेको घाउ देखाउनुभएको थियो । त्यसकारण उहाँले लेखेका कथा पनि सत्य घटनामा आधारित हुन्थे । उहाँको साहित्य पनि समाज र वरपर भएका घटनाहरू नै हुन्थे ।’
देउवाले बीपीको ११० औँ जन्मजयन्तीको सन्दर्भमा कांग्रेस कार्यालयको आकाशमा ११० वटा बेलुन उडाएर महोत्सवको उद्घाटन गरेका छन् ।